Սուրեն Պարսյան, տնտեսագետ, իրավաբան, ՀՊՏՀ միկրոէկոնոմիկայի ամբիոնի ասպիրանտ
Ձեր ծանոթներից ստացած կլինեք <<համագործակցության>> առաջարկ կամ լսած կլինեք արագ ու շատ փող աշխատելու հնարավորության մասին, որի համար պետք է ընդամենը 500-1000 ԱՄՆ դոլարի չափով ապրանք կամ ծառայություն ձեռք բերել միջազգային բիզնեսի մասը դառնալու համար: Առաջին անգամ այդ <<բիզնես>> համակարգի մասին լսել էի տարիներ առաջ,
երբ իմ բարեկամին առաջարկել էին ձեռք բերել 600 ԱՄՆ դոլարով շվեյցարական ժամացույց սեփական օգտագործման կամ վերավաճառելու նպատակով: Իր պատմածից ելնելով, իր հնարավորությունները իմանալով՝ խորհուրդ տվեցի հեռու մնալ այս <<բիզնեսից>>: Մի քանի օր առաջ իմ ծանոթներից մեկը (ում երկար ժամանակ չէի տեսել, իր մասին չէի լսել) առաջարկեց համագործակցել <<բիզնես պլանի>> մշակման հարցում, բայց պարզվեց բախտ է վիճակվել անմիջականորեն ծանոթանալ այսպես կոչված <<ցանցային մարքետինգի>> հետ: Պետք է շնորհակալություն հայտնեմ, իրոք, շատ հետաքրքիր և անհրաժեշտ տեղեկություն ստացա:
Ենթադրենք այդ Ապրանքը ձեռք ես բերում վերավաճառքի համար, մեծ խնդիր է առաջանում՝ դու կարո՞ղ ես արդյոք ոչ վստահելի ծագումով, թանկարժեք Ապրանքը վաճառել Հայաստանում, երբ աղքատությունը պաշտոնական տվյալներով կազմում է 35 տոկոս: Կարծում եմ՝ կհամաձայնվեք նաև՝ գնողունակ, ունևոր սպառողները այդպիսի թանկարժեք Ապրանքները ձեռք կբերեն միայն բրենդային խանութներից՝ բացառելով կեղծիքը, և ոչ <<ձեռի վրից>>: Ի դեպ ապրանքի գնումը իրականացվում է էլեկտրոնային եղանակով, Հայաստան առաքումից հետո Ապրանքի արժեքի 32 տոկոսի չափով պետք է մաքսավճար և ԱԱՀ վճարել, արդյունքում՝ քո ձեռք բերած Ապրանքի արժեքը 32 տոկոսով ավելանում է(Օրինակ` 600$ (Ապրանքը)+600$*32% =792$):
2-րդ տարբերակը՝ Ապրանքը ձեռք ես բերում սեփական օգտագործման նպատակով: Արդյո՞ք բիզնես սկսողը իրեն կարող է թույլ տալ անձնական կարիքների համար ձեռք բերել թանկարժեք ապրանքը, արդյո՞ք դրա կարիքն ունի, և դա տրամաբանակա՞ն է… Միանշանակ ոչ, բայց պարզվում է, որ այդ Ապրանքը ձեռք բերելով՝ Դուք կդառնանք <<ներկայացուցիչ>> , Ձեր առջև կբացվի փող աշխատելու լավ հնարավորություններ, իսկ այդ հնարավորությունը կայանում է նրանում, որ կարողանաք Ձեր նման, նույն ակնկալիքներով մարդկանց դարձնեք <<ներկայացուցիչ>>, այսինքն՝ իրենք իրենց հերթին պետք Ապրանք ձեռք բերեն և իրենց ներդրումը ունենան: Ձեր գումար վաստակելը կախված է լինում Ձեր կողմից համակարգ բերված անձանց թվով և նրանց ներդրած գումարների չափով: <<Ներկայացուցիչներ>> հավաքագրելու համար Դուք հնարավորություն կունենանք (հիմնականում վճարովի) դասընթացներ անցնել, մասնակցել միջազգային հավաքների և այլն: Ոչ տնտեսագետի կամ քիչ տեղեկացված անձի համար կարող է համոզիչ և տպավորիչ թվալ <<ցանցային մարքետինգ>>, <<էլեկտրոնային առևտուր>>, <<ժամանակային և գումարային լոմեր>>, <<բիզնես պլան>>, միջազգային կազմակերպությունների անվանումներ և այլ անծանոթ բառերը, սակայն այս համակարգի, ինչպես նաև ցանկացած ֆինանսական համակարգի հիմքում ընկած է անձնական ագահությունը, երբ համակարգի կայունությունը, քո փող աշխատելու հնարավորությունը պայմանավորված է <<նոր ներկայացուցիչների>> մուտքով: Սա նման է ԱՄՆ-ի ֆինանսական համակարգին, որը 2008 թվականի ֆինանսատնտեսական ճգնաժամի պայմաններում անկում ապրեց, քանի որ պարտքը պարտքով փակելով ձևավորված ֆինանսական բուրգը <<նոր>> գումարներ չհոսելու դեպքում ուղղակի փլուզվում է:
Մտահոգիչ է հանդիսանում այն փաստը, որ այս <<ցանցային մարքետինգ>> համակարգի մեջ հաճախ ներգրավվում են երիտասարդները իրենց արագ ու շատ հարստանալու մոլուցքով: Երիտասարդներից շատերը, հարազատներից ու ծանոթներից պարտք անելով իրենց համար պատկառելի գումար(500-1000ԱՄՆ դոլար և ավելի), մտնում են <<խաղի մեջ>>, այնուհետև՝ փորձում իրենց շրջապատի անձանց ներգրավվել այս համակարգ, հակառակ դեպքում՝ իրենց ներդրած գումարը անտեղի կլինի, կկորի:
Աղբյուրը՝ Սուրեն Պարսյանի անձնական բլոգ
0 comments:
Post a Comment