Monday, February 25, 2013

Իմ իդեալական պետությունը


Դեռևս անտիկ աշխարհում տարբեր են եղել պետության մասին պատկերացումները: Մարդիկ կերտել են իդեալական պետության միֆը: Իր պատմության ողջ ընթացքում մարդկությունը ձգտել է կերտել իդեալական պետություն, իդեալական հասարակարգ:
 Ըստ իս իդեալական է այն պետությունը, որտեղ իշխանությունը ծառայում է հասարակությանը: Պետությունը սահմանվել է, որպես մի ուժ, որը շահագործում է
շահագործվողներին: Սա պետության դասական սահմանումներից է: Ես իդեալական պետության մոդելը պատկերացնում եմ այլ կերպ: Պետություն, որտեղ նախ և առաջ չկա կոռուպցիա: Այն թափանցիկ է բոլոր առումներով: Այդպիսի պետության մեջ չկան խիստ տարբերակված դասակարգեր: Թե՛ ներքին և թե՛ արտաքին քաղաքականության նպատակն է բարելավել մարդկանց կեցությունը:
Իդեալական պետության մեջ ամեն ինչ և ամեն ոք գործում է օրենքի և սահմանադրության շրջանակներում է: Այդ ժամանակ չեն լինի  անձեռնամխելիներ ու արտոնյալներ: Բոլորը հավասար կլինեն օրենքի և հատկապես պատժելիության պարագայում: Պետական համակարգում խիստ կարժևորվի նաև կրթության դերը: Այն կլինի անվճար, հասանելի բոլորին: Սակայն կլինի այնպիսի մրցակցային դաշտ, ուր կհաղթեն միայն արժանիները:
Իդեալական պետության մեջ ամեն ինչ պետք է լինի իր ճիշտ տեղում: Խիստ կարևոր է արդարադատության անկաշառելիությունը, մարդու իրավունքների անվերապահորեն պահպանումը: Իդեալական պետության համար կարևոր կլինի յուրաքանչյուր քաղաքացու արժանապատվության և անվտանգության պահպանումը: Այդպիսի պետությունը հզոր և հաստատուն իրավական համակարգ պիտի ունենա: Իդեալական պետության մեջ աշխատավորները կլինեն  ապահով և բարեկեցիկ կյանքով ապրող արժանի քաղաքացիներ: Կրթություն ստացած ամեն մի մարդ կունենա աշխատանք: Ամենակարևորը՝ չեն լինի դասակարգային խիստ շերտավորումներ: Հասարակության մեջ չպիտի լինեն տարբեր բևեռներ: «Մեկը բոլորի, բոլորը մեկի համար»  նշանաբանը կուղեկցի ամենքին:
Գիտենք, որ իդեալական պետություն չի կարող լինել: Մարդն իր բնույթով երբեք չի կարող ստեղծել ու ապրել իդեալական հասարակարգում: Իդեալական պետությունը կարող է պարտադրվել օրենքով, խիստ կարգապահությամբ: Այսինքն՝  այն եղել է ու կմնա մարդկության անկատար երազանքներից  մեկը: Պարզապես կարելի է ձգտել ստեղծել իդեալականին մոտ պետություն,  չէ որ այն հենց մեզ համար է:

Հեղինակ՝ Լարիսա Սիմոնյան, 11-2 դասարան:

0 comments:

Post a Comment

 
© 2013 Հեռադիտակ | Designed by Making Different | Provided by All Tech Buzz | Powered by Blogger | Edited By Logic